Menu Close

ಆಲದಗೆರೆ ಮಾಯಕ್ಕಳ ನಿಸಿಧಿ

ಆಲದಗೆರೆ ಮಾಯಕ್ಕಳ ನಿಸಿಧಿ
ಊರು- ಆಲದಗೆರೆ.
ತಾಲ್ಲೂಕು – ಹಿರೇಕೆರೂರು.
ಜಿಲ್ಲೆ – ಹಾವೇರಿ.

ಶಾಸನ ಇರುವ ಸ್ಥಳ – ಕರಿಯಮ್ಮನ ಗುಡಿ ಹತ್ತಿರ.
ಕಾಲ – ಹದಿಮೂರನೆ ಶತಮಾನ.
ಪ್ರಕಟಣೆ – ಉಪಸರ್ಗ್ಗ.
ಪ್ರಕಾರ – ನಿಸಿಧಿ ಶಾಸನ
ಭಾಷೆ/ಲಿಪಿ – ಕನ್ನಡ.

೧ @ಸ್ವಸ್ತಿ ಶ್ರೀ ಮನ್ಮಂಡಳಾಚಾರ್ಯಾರು ಶ್ರೀ ನಂದಿಭಟ್ಟಾರಕ ಶಿಷರು
೨ ವರ ನಯಕೀರ್ತಿ ಮುನೀಂದ್ರ ನಿರುಪಮ ಸೂರಸ್ಥಗಣ ಮ
೩ ಹೋದದಿಚಂದ್ರ ಪರಮ ತಪೋನಿಷ್ಟ ನೆಗಳ್ದಂ ಧರೆಯೊಳು |
೪ ಶ್ರೀ ನಂದಿಮುನಿಪನಗ್ರ ತನೂಜಂ || ಅವರ ಗು
೫ ಡ್ಡಿ ಮಾಯಕ್ಕ ಸಮಾಧಿವಿಥ್ಥಿಯಿಂ ಮುಡಿಪಿ
೬ ದಳು

ಅರ್ಥ : ಶುಭ ಶ್ರೀಮನ್ ಮಂಡಳ ಆಚಾರ್ಯ ಶ್ರೀ ನಂದಿಭಟ್ಟಾರಕ ಶಿಷ್ಯರಲ್ಲಿ ಶ್ರೇಷ್ಠೋತ್ತಮರಾದ ನಯಕೀರ್ತಿ ಮುನಿಯೂ ಒಬ್ಬ. ನಂದಿಮುನಿಯ ಶಿಷ್ಯ ಪ್ರಮುಖರಾದ ನಯಕೀರ್ತಿ ಮುನಿಯು ಉಪಮಾತೀತವಾದ ಸೂರಸ್ಥಗಣಕ್ಕೆ ವಿಶಾಲ ಸಮುದ್ರದಲ್ಲಿ ಎದ್ದುಬಂದ ಚಂದ್ರನಂತಿದ್ದ. ಅತಿಶಯ ತಪನಿಷ್ಠತೆಯ ಗುಣಸ್ವಭಾವದಿಂದ ನಯಕೀರ್ತಿ ಮುನಿಗಳ ಕೀರ್ತಿ ಧರೆಗೆಲ್ಲ ಹಬ್ಬಿತು. ಈ ಬಗೆಯ ಶ್ರೇಷ್ಠ ಗುಣಾವಳಿಯನ್ನು ಹೊಂದಿದ ನಯಕೀರ್ತಿ ಮುನಿಗಳ ಗುಡ್ಡಿ(ಶಿಷ್ಯೆ)ಯಾದ ಮಾಯಕ್ಕಳು ಸಮಾಧಿವಿಧಿಯಿಂದ ಪ್ರಾಣತ್ಯಾಗ ಮಾಡಿದಳು.

೧೨ ನೆಯ ಶತಮಾನದಲ್ಲಿ ನಡೆದ ಧಾರ್ಮಿಕ ಕಲಹದಲ್ಲಿ ಹಾಳಾದ ಜೈನಕೇಂದ್ರಗಳಲ್ಲಿ ಆಲದಗೆರೆಯೂ ಒಂದು. ಇಲ್ಲಿ ಒಂದು ಬಸದಿ ನಿವೇಶನ , ಅವಶೇಷಗಳು, ನಾಲ್ಕು ನಿಸಿಧಿಗಳಿವೆ. ನಾಲ್ಕು ನಿಸಿಧಿಗಳಲ್ಲಿ ಮಾಯಕ್ಕಳ ನಿಸಿಧಿಯೂ ಒಂದು. ಏಕ ಹಂತದ ಈ ನಿಸಿಧಿಯ ಮಂಟಪದಾಕೃತಿಯಲ್ಲಿ ಮುನಿ, ಜಿನ, ಮಾಯಕ್ಕಳ ಉಬ್ಬುಶಿಲ್ಪಗಳನ್ನು ಕೆತ್ತಲಾಗಿದೆ. ಮಾಯಕ್ಕಳ ಶಿಲ್ಪದ ಕೆಳಗೆ ಒಂದು ಬಿಲ್ಲಿನಾಕೃತಿಯಿದ್ದು, ಬಹುಶಃ ಇವಳ ಗಂಡ ಯುದ್ದದಲ್ಲಿ ಮಡಿದಂತೆ ಸೂಚಿಸುತ್ತದೆ. ಈ ಸಂದರ್ಭದಲ್ಲಿ ಮಾಯಕ್ಕ ಸಲ್ಲೇಖನ ವ್ರತವನ್ನು ಸ್ವೀಕರಿಸಿ ಸಮಾಧಿಯಾದಂತೆ ತೋರುತ್ತದೆ.

ಆಧಾರ –
ಉಪಸರ್ಗ್ಗ : ರವಿಕುಮಾರ ಕೆ ನವಲಗುಂದ.
ಪುಟ ಸಂಖ್ಯೆ : ೬೮-೬೯.
ಪ್ರಕಟಣಾ ವರ್ಷ – ೨೦೧೬.
ಪ್ರಕಾಶಕರು – ಭಗವಾನ್ ಶ್ರೀ ೧೦೦೮ ನೇಮಿನಾಥ ದಿಗಂಬರ ಜೈನ ಮಂದಿರ ಕಮಿಟಿ (ರಿ) ಹಾವೇರಿ.